ع.ي.ا. ل @@@ عيال

سئلت لماذاوما هدفها؟أجيب بأنه من الانانيه أن نكتب عن أنفسنا فقط فى حين أن الأطفال( معجزة حية من معجزات الرحمن) يُعَّلِمونناو يقَوِّمون الكثير من سلوكياتنا بتـلـقـائـيـه ليس لها مثيل برغم تكبّرنا على الأعتراف بهذا ............ محركى الأحداث: **بودى..............كى جى 1 ..5 سنوات **أميرة.......ثالثة ابتدائى .شهادة يا ناس...8 سنوات **نوران.......ثانية ابتدائى....7 سنوات حاليا اخيرا و ليس أخرا , محمد أحمد سنتين و مفيش كلام

الثلاثاء، يناير 18، 2005

عيال ضياع

تك تك تك ممكن تفتحى يا طنط
مش هنا يا اشرف هنركب ورا هنا و انا هركب معاكوا
ركبت الست و عيالها فى الكنبة الخلفية و عيالها الاثنين وقفوا ورايا فوق دماغى عشان يشوفوا الطريق
تن تن تن تن تن
الميكروباص حمل الناس كلها و بدأ يتحرك لما الأشاره بتاعة السكة الحديد بدأت تشتغل و الميكروباص وقف يستنى الاشارة تفتح
شايف ياض شايف المترو ماشى فوق اهو اهو
مترو ايه با عبيط, المترو بيمشى تحت الارض بس
ياله ماهو هناك اهو , منور و ماشى من فوق محطة القطر
انت كداب , دة قطر تانى يابنى
عمو عمو خد واحد طلبيه
لأ دة المترو بتاع الجيزة
طيب بص القطر اللى بجد هناك اهو بدأ يمشى
فين فين؟؟
هناك اهو , انت ما بتشوفش حاجة ابدا؟
شايف الحتة المفتوحه تحت الكوبرى ده أهة القطر ماشى فيها هناك اهو
فين؟
يابنى اللى تحت دى.
اه اه شوفتها
امال اللى ماشى فوق دة ايه؟
ما قلتلك المترو, ايه ما بتفهمش
عمو عمو هو ده قطر ولا مترو
(مترو يا بابا,( غيظ الدنيا على وشه عشان كل الكلام دة فى ودانة
هو فية مترو بيمشى فوق الأرض و مترو بيمشى تحت الارض؟
ياله هو المترو كدة ساعات يمشى فوق و ساعات يمشى تحت الارض
لأ احنا اخدنا فى المدرسه ان مترو الانفاق بيمشى تحت الارض بس.
تن تن تن تن تن تن تن
و اتفتحت الاشارة و العيال غيروا الكلام
بص محل العصافير دة
ياه شوفت العربية دى
عمو ممكن تمشى اسرع شويه
بص بص شوف الكلب ده عامل ازاى
.......
على جنب من فضلك

الأربعاء، يناير 12، 2005

منطق

يا جدو يا جدو .. نوسة و أميرة كانوا مسكنى , واحدة ماسكة ايدى كده و التانية ماسكة رجلى كده و مكنتش عارف اتحرك
يا خبر, لأ روح قولهم كدة غلط و عيب
( رجع بودى بعدها عشان يكمل لعب معانا)ء
إحنا مخاصمينك و مش هنلعب معاك علشان رحت تشتكى لجدو و احنا بنلعب معاك
لأ هتلعبوا
( راحت كل واحدة فينا عملت نفسها زعلانة و دورنا وشنا عنه)ء
ها ها هاتلعبوا و متزعلوش ماهو اللى انتوا عملتوه كان أكبر من كده
إنتى واحدة مخلصة جامعة و التانية ف ثالتة ابتدائى
KG1وآ.. وآ.. وآ.. أنا صغير لسه فى
و انتوا ضايقتونى و وجعتولى ايديه و...

ما كملش بودى اللى بيقوله لانى مسكتة و هريته بوس و تفعيص على كلامه ده

ما أنتى كمان

عاجبك كدة, أديك خليت تيته تزعقلى , مبسوط (قلتها لبودى مفتعلة الغضب)
.
و إيه يعنى ما أنا مامتى بتزعقلى كتير , مش مشكلة(إستهانة بالحدث للتهوين )

.
بس أنت عيل , هى تزعقلك زى ما هى عايزة

.
.ما أنتى كمان عيلة (تلقائية , و تعجب مما أقول ) ..
.
إيه!!!
.
إرتباك و محاولة تصحيح )
... أه , عيلة بس آ.. بس آ ..آ كبيرة شوية )



الأحد، يناير 02، 2005

مشكلة عويصه

دلوقتى بقى هنحطهم إزاااى؟؟؟ (يبدوا على وجه بودى التفكير العميق)ء
.الأول نحط دى و بعدين الثانية
لأ لأ يا بودى كده مش هينفع , بصوا إحنا نعوج دى كده و نحط الثانية جنبها
و تبدأ نورا التنفيذ مقتنعه بسلامه الحل )ء )
.يا نورا لأ بصى بصى مش هيدخلوا كده إحنا نحطهم تحت بعض
لانتى ولا هو كده غلط أنا شفت ماما بتحطهم كده, تخرى بس شويه علشان أعرف اوريكوا( و بدأت أميرة تحركهم محاولة تذكر الطريقة بتاعة ماما)
ء
ايه ده إنتوا بتعملوا ايه هنا؟؟ بقى كده يا نوسه واقفه تتفرجى عليهم و الله انتى رايقه
!!!! عن اذنك انت و هى خلينى احط الصوانى عدل و أولع الفرن علشان ناكل النهارده

السبت، يناير 01، 2005

ليه؟

كنا فى رمضان وقت الافطار
"سيب اللعبة دى يا بودى علشان تاكل"
"يا عمو انا هلعب بيها و انا باكل"
"مينفعش وقت الاكل مفيش لعب"
"بس انا عايز العب بيها"
"لأ يعنى لأ مينفعش, خد اللعبة و حطها على البوفيه لغاية ما تخلص"
"اهئ اهئ ياماما انا عايز العب بيها بقى"
"انت سمعت عمو قال لأ يبقى لأ"
عياط و صراخ و هبد و رزع و هييصه
"تعال يا بودى بكار جه ع التلفزيون"
و جه بودى و قعد يتفرج و هو نازل زن و عياط
..و بعد شويه عم السكون و بطل العياط فجأة و
:):):):):):):):):):):) "!ماما هو انا كنت بعيط ليه؟"