ع.ي.ا. ل @@@ عيال

سئلت لماذاوما هدفها؟أجيب بأنه من الانانيه أن نكتب عن أنفسنا فقط فى حين أن الأطفال( معجزة حية من معجزات الرحمن) يُعَّلِمونناو يقَوِّمون الكثير من سلوكياتنا بتـلـقـائـيـه ليس لها مثيل برغم تكبّرنا على الأعتراف بهذا ............ محركى الأحداث: **بودى..............كى جى 1 ..5 سنوات **أميرة.......ثالثة ابتدائى .شهادة يا ناس...8 سنوات **نوران.......ثانية ابتدائى....7 سنوات حاليا اخيرا و ليس أخرا , محمد أحمد سنتين و مفيش كلام

الخميس، أبريل 28، 2011

شر طرده

طبعا الوحيد القادر المفترى اللى ممكن يعمل كده هو الأخ موكى " محمد بيه اخر العنقود " او كما اسميته من قبل كابتن جوده
إزاى ؟ عادى , ده شئ من بديهيات الحياه , يعنى مش حاجه صعبه ولا معجزه ,

انا قاعده فى امان الله على اللاب توب فى المكتب ,
هو زق الباب و دخل , و استخدم ذراعى و رجلى كأدوات مساعده على التسلق علشان يستخدم اللاب توب ,
طلع على رجلى و دور اللاب توب ناحيته و هاتك يا لعب فى الزراير ,
و طبعا علشان انا عقلى على قدى مش فى مستوى تفكيره , قلت اشغل له الكارتون اللى بيحبه
الراجل هاودنى على قد عقلى شويه و قعد يتفرج دقيقه , اتنين , ثلاثه
و يظهر انى زودتها بقى و مفهمتش
الراجل بكل بساطه نزل من على رجلى , شدنى من كفى ,
قوم عقلى الصغير يقولى يمكن عايزك تجيبى له ميه من المطبخ
فأتحرك من على الكرسى و امشي وراه , لقيته وقف و بعدين زقنى قدامه
فضل يزق فيه امامه لحد ما وصلنى عند باب المكتب ,
و بحركه رمى بسيطه , رمى كفى من كفه و زقنى لبره بعد الباب و لف و رجع يقعد هو بقى على الكرسى يتفرج على الكارتون براحته

بس لو تسألونى .... قلب من ذهب

أنا :خد يا بودى , شوف كده دول على مقاسك ؟
بودى : شكلهم صغير عليا , البنطلون صغير خالص , و القميص مضايقنى كده من عند كتفى
أنا : طيب خلاص نروح المحل نغير المقاس .
رحت مع والده بودى , غيرنا المقاس و تانى يوم ........
والده بودى :الهدوم المره دى جت على مقاسه , بس البنطلون عايز يقصر , لما وريتهم لبودى علشان يقيسهم لقيته بيقول لى,
بودى : انت بس لو تسألونى انا عايز ايه ؟ انا مش عايز قميص و بنطلون , مش بحب البسهم - و تعلو وجهه تكشيره معتاده -
والده بودى : ما انت لازم يكون عندك هدوم شيك لأى خروج
بودى :انا مش عايز ده , انا عايز تى شيرت بتاع جون سينا , كان بيتباع فى كارفور.

المهم , بودى بقى , جه يقولى ايه , و رغم انى عارفه الخلفيه بتاعة الحوار , بس هو مش يعرف انى اعرف :
شكرا يا نوسه
الهدوم طلعت حلوه قوى , و البنطلون لايق على القميص خالص.