ع.ي.ا. ل @@@ عيال

سئلت لماذاوما هدفها؟أجيب بأنه من الانانيه أن نكتب عن أنفسنا فقط فى حين أن الأطفال( معجزة حية من معجزات الرحمن) يُعَّلِمونناو يقَوِّمون الكثير من سلوكياتنا بتـلـقـائـيـه ليس لها مثيل برغم تكبّرنا على الأعتراف بهذا ............ محركى الأحداث: **بودى..............كى جى 1 ..5 سنوات **أميرة.......ثالثة ابتدائى .شهادة يا ناس...8 سنوات **نوران.......ثانية ابتدائى....7 سنوات حاليا اخيرا و ليس أخرا , محمد أحمد سنتين و مفيش كلام

الاثنين، يناير 12، 2015

طلعت لأسنانى عضلات قويه

مشهد داخلى ، عيادة دكتور الاسنان.

الدكتور : يالا يا ايناس اكشفى انت الاول.
موكى : لأ انا الأول.
و اصر موكى يتكشف عليه الأول.

اتكشف على موكى و اتعمل له حشو فى ضرسه. و احنا مبهورين بسكوته و عدم رفضه و عدم توجعه من ألم أسنانه اثناء الحشو.

طبعا ، بعد الحشو ما خلص كان فيه الحوار التالى .
- موكى بطل تحط صباعك على الحشو علشان ما يقعش.
- يقع !!! ليه
- علشان لسه طرى ، مش تحط صباعك عليه ولا لسانك ،و مش تاكل عليه النهارده علشان ما يقعش.
- أنا جعان ( اول جمله متوقعه بعد قلنا الاكل ممنوع )
- معلش ممكن لما نروح ناكل زبادى و نشرب عصير بس مش ناكل على الناحيه اللى فيها الحشو.
بقى يلف فى العياده و يرجع يقول لى " الحشو وقع ؟؟ "
و شويه يجى يفتح فمه ويقول لى "انا هعمل لسانى كده " و يرفع لسانه جوه فمه علشان الحشو ما يقعش.
- انا جعان ، انا عايز اكل  M&Ms 
كان بيسأل " الحشو وقع ؟؟ " بمعدل مره كل ثانيه
كان بين كل كلمتين يسأل نفس السؤال.

و احنا مروحين ، حبيت ابين له انه كان اشطر واحد فينا عند الدكتور و انه قوى
- يا موكى الدكتور لما عمل لى أسنانى , وجعتنى , اشمعنى بقى وجعتنى و مش وجعتك !!
- اه مش وجعتنى، 
اصل انا اسنانى كانت صغننه و بعديييييين لما قعدت عند الدكتور طلعت لأسنانى عضلات قويه قوى ( و هو بيوصف قوه العضلات بذراعيه الاثنين و على وشه تكشيره قوه ) علشان كده ماوجعتنيث.

هو انا جاى النهارده عندنا ؟

مشهد داخلى : صالة بيت تيتا و جدو 
نوسة بتتصل بالبيت عند الاطفال علشان و هما جايين يشتروا شريط ستريم علشان زورها واجعها.


مشهد دالخى : صالة بيت الأطفال 
جرس التليفون بيرن, موكى بيجرى على التليفون علشان يرد


نوسة : ألو
موكى : ايوه مين.
نوسة : كل شويه ، ايوه مين ، ايوه مين ، انت مش عارفنى !!!!
موكى : ميييين ، اه ، نوسة ، الحمد لله (قبل ما  أسأله ازيك )
نوسة : ازيك عامل ايه ، وحشتنى
موكى :الحمد لله، معلش اصلى باكل ، هنادى لك ماما.
نوسة : طيب استنى بس ،  انت جاى النهارده  عندنا ؟
موكى :معرفش
موكى : ماما ، ماما .......ماما كلمنى نوسة  و فضل ينادى كتييييييييييير قوى
ماما:ايه بتنادى ليه ، ، حاضر.
موكى :ماما ، هو انا جاى النهارده عندنا ؟؟؟
موكى :ماما ، هو انا جاى النهارده عندنا ؟ هو انا جاى النهارده عندنا ؟؟؟
ماما : عندنا فين ؟
موكى : عند تيته .