راجعي لي انا كمان

 كنت قاعدين انا و مروان ابن خالة موكي بنراجع جبر و موكي طبعا زي النحلة حولينا و علي نغمة واحدة " راجعيلي انا كمان"

يا موكي انت شاطر مش محتاج اراجع لك

مروان مش شاطر زيك (مروان اولي ثانوي، موكي اولي ابتدائي)

لأ راجعيلي علثان تعرفي اني شاطر

ماشي

و اخدنا الكراسة علشان نكتب مسائل حساب عميقة و عويصة 

 لموكي

حل موكي و خلص و كتبنا غيرهم و خلص و بعدين المسكين لقي اني بقول بس ببؤي شاطر

فبدأ يحط علامة الصح بنفسه لكل سطر

فأخدتهم و صححت له و كان عايز علامة صح كبييييرة بطول الصفحة

عملنا العلامة و اعطيته ١٠من ١٠ كمان ( تن اوفر تن)

موكي بص كده و بدأ يلعب في صوابع رجله علامة التوتر و بعدين قرر يسألني و امره الي الله

نوثه هو ينفع اخليها ( تونتي اوفر تونتي)؟؟؟؟

ليه يا رب

استكمالا لما تم من أحداث فى قصة النصاب،

موكى يناجى ربه ....

بصوت عالى .....

علشان ماما تسمع     :)

 " انا زعلان قوى , ليه يا رب كده ، 

ليه خلقتنى شقى و بعمل شقاوه و بعمل حاجات وحشه. "

النصاب

جميع المشاهد نقلا عما سمعته من روايات اخوه عبد الرحمن و الأم.

مشهد 1 :

موكى خارج من الفصل بتاع المكتبه فى ايد المدرس

المدرس : من فضل حضرتك ، انا مش عايزه يحضر تانى ، هو شقى و مش بيستفيد ولا بيسمع ولا بيخلى باقى الاطفال تستفيد.

الام  فى ذهول.

مشهد 2 :

فى السياره ، ماما : انت ها تتعاقب علشان مش بتحترم الفصل ولا بتسمع الكلام.

تخيلى الشخصى انه رد عليها بالإجابه الخالده بتاعته : انا اصلا مش عايز اروح و انتى بتودينى غصب عنى ، اسحبى الفلوس انا مش عايز اروح.

مشهد3:

ليلا تقرر الأم الذهاب فى مشوار و هتاخد موكى معاها ، اتحضروا و لبسوا و فتحوا الباب علشان يخرجوا للأسانسير

موكى يرجع علشان يقول لعبد الرحمن حاجه

موكى : يا عبد الرحمن ، هات التابلت ، ماما قالت خلاث ممكن اخده.

عبد الرحمن يتعجب من سرعة انتهاء العقاب ، و كان خلاص هايجيب له التابلت

الام نسيت حاجه و رجعت تجيبها من جوه الشقه

عبد الرحمن يسألها ، العقاب خلص بسرعه كده.

على ما الام تستوعب السؤال و تبدأ ترد بإنها لم تنهى العقاب، موكى ياخد ديله فى سنانه و يجرى.

اسمها

يوم حر ، يوم جمعة و كان راجع من المكتبه مع مامته و عدى عليه و اخدنى بيته. 

موكى ، مجنون عربيات, و احنا فى العربيه كالعاده بيحصل الحوار التالى بينه و بين اى كائن موجود :
" ليه بابا ماجبش العربيه دى ، دى اقوى "

" يا ماما انا عايز نوسة هى اللى تسوق علشان مش معاها عربية دلوقت ، و انت تعالى فى المكروباص"

" يا ماما عربيتك موتورها ضعيف ، ثوقى ثوقى "

و بيفضل طول ما مامته سايقه على نفس المنوال، و احنا نازلين بقى لقيته بيقولى " يا نوسه العربيه دى و شاور عليها و سكت شويه بيحاول يجمع اسم ماركتها...... اسمها زى اسمك "

ببص على اللى بيقول عليها ، لقيتها عربيه نيسان 

العيد خلص

موكى ، مجنون عربيات و شاغله جدا عربيه جدو الجديده .

مستنى جدو ينزل من السفر علشان يروح يشتريها معاه، كان راح معايا مره معرض سيارات كان فاتح فى العيد فى مول العرب.

الراجل هناك قال لنا " احنا للأسف علشان العيد و كده مش فاتحين العربيات ، بعد العيد تكون مفتوحه ، بس تقدروا تتفرجوا عليهم من بره لو عايزيين"

خلصنا اليوم و روحنا و فاتت ايام و اسابيع.

موكى : ماما انا عايز اروح مول العرب

ماما : ليه

موكى : علشان العيد خلص و الراجل بتاع العربيات بقى معاه المفاتيح و انا عايز اتفرج على العربيات من جوه.