أنا عايز أنام

أنا هدخل أنام و أنتى تحكيلى حدوته

تؤ تؤ مليش مزاج تعالى نام و انا اغطييك

.

...لأ بقى يا نوسه بطلى غلاسه ...

... رجلى لسه متغتطش ...

...ادعكيلى فى ظهرى عشان اعرف انام ..

...هنا..

....هنا؟.. لأ مش من فوق الهدوم..

... فين المخده الكبيرة..

... لأ دى صغيرة مش هعرف احط ايدى تحتها...كده كويس!؟

...يووه اهو رجلى بقت عراينه تانى غطينى كويس بقى...

.

.

.

شوف يا سيدى .. كان ياما كان و ما يحلى الكلام إلا بذكر النبى عليه الصلاة و السلام

كان فيه واحد اسمه الشاطر حسن و ك ..ء

.

هى دى بتاعة التنين و الأميرة؟؟

.

لأ دى واحده تانية

.

بس انا عايز بتاعة التنين

.

ماشى كلامك

كان فيه واحد اسمه الشاطر حسن و كان عايش فى بلد اسمها بلاد ال...ء

.

نوسة اطفى النور الكبير و خلى نور صغير أووى أوى... بس انا مش بخاف دة عشان لما اصحى عشان اشرب ميه

أشوف الإزازه و موقعهاش

.

حاضر يا سيدى

كان فيه واحد اسمه الشاطر حسن و كان عايش فى بلد اسمها بلاد ال...ء

.

و بدأنا الحكاية و طفينا النور الكبير و خلينا الصغير أوى أوى و لقيت كف صغير خرج من تحت المخدة و مسك فى كفى و صاحبها غمض عينية و ناااااااااااام