ع.ي.ا. ل @@@ عيال

سئلت لماذاوما هدفها؟أجيب بأنه من الانانيه أن نكتب عن أنفسنا فقط فى حين أن الأطفال( معجزة حية من معجزات الرحمن) يُعَّلِمونناو يقَوِّمون الكثير من سلوكياتنا بتـلـقـائـيـه ليس لها مثيل برغم تكبّرنا على الأعتراف بهذا ............ محركى الأحداث: **بودى: كى جى 1 ...5 سنوات **أميرة: ثالثة ابتدائى .شهادة يا ناس...8 سنوات **نوران: ثانية ابتدائى....7 سنوات حاليا اخيرا و ليس أخرا , محمد أحمد سنتين و مفيش كلام. عام 2017: بودى 17،أميرة21،نوران20،موكى8 سنوات

الجمعة، يوليو 24، 2020

سوري ، ، ، يعني باردون ،،،، يعني لا تؤاخذني يا اخي ،،، يعني انا و انت و الاخلاق

جدو : يالا يا موكي نصلي المغرب 

موكي راح اتوضأ و بدأ هو و عبد الرحمن يصلوا وراء جدو
موكي مش بيبطل فرك و دايما بيتحرك و هو بيصلي ، ف هوب داس على رجل اخوه
بس ازاي ده موكي ده الادب كله ، موكي الأخلاق كلها، ده الواحد ماعندوش غير موكي ، إلا موكي ، السمو و الرفعة و الحق و العدل موكي

يسكت موكي؟ يسيب اخوه و هو بيصلي تصعب عليه نفسه علشان موكي داس على صابعه ولا رجله ، ابدا ، لا ممكن ابدا ، مايحصلش
على جثة الاخرين
و جت الفرصه سريعا لموكي الشهم الشجاع الحقاني العدل و نزلوا يسجدوا فى الأرض، فموكي انتهز فرصة التقارب و دور وشه لأخوه و قاله "سوري" و كمل سجود

الجمعة، مارس 24، 2017

انا عايز اربى قطه ، امال لو قلت كلب!!!!

تعود جذور القصة و اسبابها لثلاث أعوامٍ مضت ،  لما  دخلت عليهم البيت بالقط مشمش ، من باب يسلى وحدتنا :)
و تدور الايام بينا و بين القط ، بس الشهاده لله ، القط كان قليط و قرفان مننا اساسا من أول يوم ، و بيتجنبنا طول السنة اللى قعدها معانا فى البيت الصراحة :)
و الحكايات معاه لا تنتهى ، موكى كان لسه 4 او 5 سنين و كان طبعا بيحب يجيبه من ديله و يستقوى عليه و علشان القط كان ذكر و كان زى ما قلنا قليط ، كان ما بيسبش ، يهبش ، يبخ ، مع ان الاطفال احباب الله ، لكن فى أمر موكى و مشمش الموضوع كان مختلف و كانوا ند لبعض ، يمكن علشان اساسا القط كان صغير وقت ما جبته ، كان عنده حوالى 6 شهور ، فعقله كان عيالى حبتين و لم يترفع عن أذيه موكى و طبعا بعد ما سبع البرمبه خلف من جارتنا اللى كانت فوقينا ( القطه طبعا ) هو و الحق يتقال كان حنين قوى على عياله و كان بيخاف عليهم مننا و من موكى اكتر من أمهم ، لدرجه انه هبش موكى مره علشان راح يبص عليهم 
المهم ، القط قرفنا فى عيشتنا و خلاها مرار طافح احتجاجا على ان البرنسيسة بتاعته طلعت بيتها تانى لدرجة اننا اضطرينا نشحته لحد بيحب الحيوانات علشان ماقدرناش نستحمله و ماقدرش ينسى حبه الاول ،
و من وقتها و اميره كل شويه تقول انها عايزه تربى قطه ، و مامتها طبعا مش ناوية تجيبهم لأن العيال دى عيال حقيقى و محدش هاينضف ورا القطه غير امهم و هى كمان بتقشعر من الكائنات الغير أدمية :)
المهم شويه و موكى بيه كمان عايز قطه
فى عيد ميلاد سعادته اللى فات و احنا رايحين نشترى هدية كان مصر يغلس على امه و يقول لها انه اشترى كلب علشان تخاف 
و فضل شويه فى الطريق يتريق انها بتخاف و يقول " امال لو كنت جبت كلب بجد !!! " و نافش ريشه قوى علشان هى مثلت عليه فى التليفون انها خايفة
الجمعة اللى فاتت بقى موكى قرر انه ها يهجر بيتهم ليه!!! تعالوا نشوف ،

مشهد خارجى  ليلى فى شارع الهرم :
نوسة : معلش يا اميرة قبل ما اروحكم البيت هانعدى على محل الحيوانات الأليفه تنزلى تشترى لنا منه كيس لب سورى علشان البغبغان اللى عندنا بقى له يوم جعان .
وقفنا عند محل الحيوانات و اميرة نزلت تشترى اللب ، موكى طبعا هايموت عايز ينزل معاها قلت له ينزل ما يخافش و ماصدق طبعا و  نزل جرى ، لجل الحظ اللطيف كان فيه واحد بيتفرج على القط الشيرازى علشان يشترى واحده و انا شفت موكى و أميرة و هما واقفين بيلعبوا مع القطط شويه و فرحانين بيهم قوى و موكى شال له القطه شويه و يطبطب و يتكلم معرفش بيقول ايه بس عارفه انه فرحان بيها و شويه و رجعوا العربية
أميرة : نوسة انا عايزة اشترى قطه بقى
نوسة : و ماله يا حبيبتى خلى مامتك تعلقك انت و القطة بره البيت
موكى : اشمعنى بقى انا كمان عايز قطه ، تعالى يا اميرة نشترىها يعنى هاتعملنا ايه يعنى
نوسة : ياسلام ماينفعش يا موكى و كمان انت عارف ان مامتك هى فعلا اللى هاتاخد بالها و تنضف وراه انتى يا اميره عايزه تقنعينى انك هاتنضفى
أميرة  بمسكنه و اصطناع :) : طيب انا بحب القطط اعمل ايه يعنى
موكى : انا كمان عايز قطه امال يعنى لو كنت قلتها اشترى كلب 
تعالى يا اميره اشترى شقه نربى فيها القطه او الكلب ماشى ؟
أميرة : اه يا حبيبى و ماله محسسنى اننا هانشتريها ب 50 جنيه مثلا
موكى : طيب بصى خلاص لما تتجوزى ،، مش انتى ها تتجوزى ؟ ، انا هاجى اعيش معاكى خلاص انا مش عايز اعيش مع ماما هاروح اعيش معاكى و نجيب القطه اللى احنا عايزنها ، مش انا ينفع اعيش معاكى ؟ و كمان علشان اعرف العب مع الولد
طبعا كنا فطسانين على روحنا من الضحك لأنه كان بيتكلم جد جدا
و بيكمل بقى 
و بصى انتى تبقى تودينى و تجبينى من المدرسة ، ماشى ؟
نوسة : يا سلام لأ بقى ما ينفعش اشمعنى عايز تبات عند أميرة فى بيتها و مش بترضى تبات عندنا فى بيتنا ؟
ماليش دعوه ، لأ يا أميرة مش هايبات عندك هه ، علشان مش بيرضى يبات عندى
موكى : لأ بقى هبات عندها ، علشان دى اختى و انا ينفع ابات عند اختى ، 
نوسة : ياسلام ما انا عمتك و ده بيت تيته و جدو اشمعنى ما ينفعش تبات عندنا
موكى : لأ هبات عندها دى اختى عارفه يعنى ايه اختى، هه يا اميره مش انا هاينفع ابات عندك ، انا خلاص مش عايز اعيش معاها 
نوسة : لأ ماليش دعوه مش هتبات عندها بقى ، تعالى بات عندى
أميره : خلاص يا جماعة ، معلش ،
و بعدين قررت تجبر بخاطر موكى و تسايره و تقوله حاجة فى ودنه عن انها لما تتجوز مثلا يعملوا حاجة ، مماكنتش سامعة ، بس هو قرر يرد عليها رد واقعى يتناسب مع شخصيته الرجوليه بلهجة استنكار و استهجان لتفكيرها الطفولى:
مش لما يبقى يحصل الموضوع ده أصلا !!!! 

الجمعة، يناير 13، 2017

انتِ جميلة قوى

كنا قاعدين بنتغدا النهاردة و الغداء كان عبارة عن سندوتشات :) فكنت كل شوية بتأكد ان كل واحد معاه اكل او محتاج اعمل له سندوتش تانى ولا لأ :)

فجأه لقيت موكى بيقول : انتِ جميلة قوى ، كل شوية تقولى عايز حاجة يا موكى اجيب 
.لك حاجة يا جدو ، اجيب لك حاجة يا تيته 

الاثنين، مايو 30، 2016

3 حيوانات مش اتنين.

سماح بتتكلم على البيت و العيال و كسلهم و عدم مشاركتهم في المحافظة على البيت و توضيبه فبتحكى لتيته :
سماح : اصل انا عندى 3 حيوانات ، كل واحد يسيب حاجته و مايشلش حاجه من مكانها
حتى الهانم جبت بلوزتها من تحت السرير النهار ده .
 
تيته بتواسيها و فجأه يطلع سى موكى في النص و يزعق و يستنكر
موكى: أنا حيوان !!!!!!!
سماح : ................. لأ طبعا يا حبيبى انت عسل ، انت جميل اسم الله عليك.
موكى : انتى قلتى عليه حيوان.
سماح : لأ هو حد بيساعدنى غيرك ،
موكى : يعنى انا مش حيوان
سماح : لأ طبعا يا حبيبى مش انت انا بتكلم على اخواتك الكبار.
موكى : طيب ازاى يعنى بتتكلمى عليهم بس ، انتى قلتى 3 حيوانات مش اتنين!!!!!!

الخميس، مايو 05، 2016

حد شايفنى ؟؟

موك موك :)

النهارده لقيته داخل يلعب على الكمبيوتر و نايم على بطنه ، قلت اعضه عادى يعنى فى "امبولته" زى ما بيقول :)
لقيته مبلول خالص 
نوسة : ايه يا موكى ده ايه اللى بلك كده ؟
موكى : الشطافه و انا فى الحمام
نوسة : طيب تعالى غير كده تبرد
موكى : لأ انا مش متضايق خلاص " عايز يلعب و بس"
نوسة و مامته  و تيته:لأ ما ينفعش تعالى غير
موكى : " و مش مشكله اللعبه يعنى !!! " بنبرة استهجان بس من غير ضيق
المهم نوسة راحت تدور له على غيار
هو بقى راح فى وسط الصاله و قلع الشورت و شد التيشرت و بيقول "حد شايفنى " و هايكمل :))))
مامته : لأ يا موكى عيب استنى
موكى : هو حد شايفنى ، ماهو مفيش حد اهه
بإعتبار حد ده يعنى حد غريب مش تيته ولا جدو ولا ماما ولا نوسة
مامته لفته بفوطه و قلعته الغيار و قالت له روح عند الحمام او فى الاوضه عند نوسة غير يالا
قرر يقف وسط الطرقة و يستنانى و لما جبت له الغيار برضه لقيته بيقول " حد شايفنى " و بدأ يلبس :)

ربنا يحميه و ييحفظة و يجعله من الصالحينن يا رب

الثلاثاء، فبراير 02، 2016

يعنى كتير ؟؟؟

سماح عايزه تروح و موكى عايز يقعد يلعب على النت ، بعد ساعة مناهده مع موكى قررت سماح تستنى شويه و خلاص.
سماح : موكى ، نص ساعة بس و بعديها هانمشى.
موكى : يعنى ايه ؟
سماح : يعنى نص ساعة تلعب و خلاص ، 30 دقيقه .
 ( بصوت طفولى جميل و حرف الراء خارج منه زى السكر و البراءه اللى فى السؤال تخلى الواحد عايز ياكله اكل).
موكى : يعنى كتيير ؟
سماح : اه كتير.
موكى : يعنى كتيى قوى قوى قوى ؟؟

حاسس ان عمتى مش عمتى.

نوسة (36 سنة)بتتخانق مع موكى (6 سنين)فى الطرقه بتاعة المطبخ و مش عايزه تخليه يعدى و يخرج.
عبد الرحمن عايز نوسة تشوف معاه حاجه على الكمبيوتر ، و نوسه تقول له حاضر جايه بس اخلص خناق الاول.
عبد الرحمن يفضل ينادى " يالا يا عمتى ، يا عمتى يالا" و نوسه مش سامعه و بتتخانق مع موكى .

فى الاخر نوسة سمعت عبد الرحمن بيقول لمامته ، " انا حاسس ان عمتى ، هى بنت عمتى "

الاثنين، فبراير 01، 2016

حاجة توجع القلب

الساعة الثانية عشر ظهرا :
تليفون نوسه بيرن بس هى مش سمعته.

الساعة الواحده ظهرا :
نوسه تشوف التليفون و تلاقيها نمرة سماح "أم اميره و عبد الرحمن و محمد "

نوسة تتصل : ألو ، ازيك يا سماح
سماح : الحمد  لله ، اخبارك ايه .
نوسة : تمام الحمد لله ، انتى اتصلتى من شويه ؟
سماح :لأ ده مش انا ، ده موكى كان عايز يحكى لك على حاجه ، بس هو بيلعب دلوقت.

الساعة السابعة مساءً :
موكى يعدى على نوسه فى البيت ، و تسلم عليه .
نوسة : موكى ، ازيك ، انت اتصلت بيه النهارده ؟
موكى : اه.
نوسة : خير ، كنت عايز تقول لى ايه ؟؟

لحظة اضطراب و تردد و حيره ، وبعدها هزتين نفى بالدماغ.
موكى : لأ خلاص مفيش.
نوسة : ايه هو اللى مفيش ، كنت عايز تحكى لى ايه ، احكى ، احكى ، انا سامعاك.
موكى : نو ، خلاص مش هاينفع.
نوسة : ليه ، يالا انا سمعاك.
موكى فضل يحاول يتملص من انه يحكى و بعدين اضطر قدام الحاحى يوضح السبب، " اصل دى حاجه توجع القلب"
نوسه  اتخضت من الجمله : الف سلامه عليك يا قلبى ، ربنا يجبر قلبك و مش يوجعه ابدا ، احكى لى بس ايه اللى حصل.
موكى فضل شويه مش عايز يتكلم و مصر انها " حاجة توجع القلب " علشان كده مش هايقدر يحكى، و بعدين اضطر يحكى قدام غبائى المستمر و الحاحى بالسؤال.بس اشطرت عليه ندخل الاوضة علشان محدش يسمع .
موكى : " اصل انا النهارده .... شفت دممممممممممم 
نوسة : شفت دم !!!! و دهشة انبهار و خوف مرسوم على وشها.
موكى : اه دم ، احمر ، شفت قطه داستها عربيه. مش قلت لك حاجه توجع القلب.