ع.ي.ا. ل @@@ عيال

سئلت لماذاوما هدفها؟أجيب بأنه من الانانيه أن نكتب عن أنفسنا فقط فى حين أن الأطفال( معجزة حية من معجزات الرحمن) يُعَّلِمونناو يقَوِّمون الكثير من سلوكياتنا بتـلـقـائـيـه ليس لها مثيل برغم تكبّرنا على الأعتراف بهذا ............ محركى الأحداث: **بودى: كى جى 1 ...5 سنوات **أميرة: ثالثة ابتدائى .شهادة يا ناس...8 سنوات **نوران: ثانية ابتدائى....7 سنوات حاليا اخيرا و ليس أخرا , محمد أحمد سنتين و مفيش كلام. عام 2017: بودى 17،أميرة21،نوران20،موكى8 سنوات

الثلاثاء، يوليو 23، 2013

عملوها الخونه ، كلاكيت تانى مره

دى عيال خاينه ، عيال عيال يعنى 
بغض النظر انهم اصبحوا اطول منى و عديتها لهم،
بس تانى مره تحصل ، اميره السنه اللى فاتت ملت الدنيا هيصه " طلعت بطاقة ، طلعت بطاقه " 
و الهانم نوران النهارده نفس الحكايه ،
مافيش اعتبار للناس اللى بتحس انها كبرت و تقريبا عجزت مع الكلام ده ؟؟
ازاى ... ازاى عيال كنت لسه شايلاهم على ايدى و كان حجمهم لا يتعدى الكف يكبروا فجأه كده ؟؟
انا كنت لسه امبارح واخداهم الشغل و بقول لهم سلموا على عمو و عمو و عمو !!!!!
امتى ده حصل ؟؟؟ 

الجمعة، يوليو 19، 2013

صلاه التراويح

إحنا فى رمضان ، 
سيبتهم و دخلت اصلى التراويح ، و انا بعيد عنكم من ذوى خشونة الركبه ، يعنى بصلى و انا قاعده على الكرسى ,
يقوم موكى بيه يدخل - مش دخول قوى ، هو إقتحام مبلطج للحجره - و يفضل يلف حوالين نفسه و يطوح فى ايده لحد ما سلمت من الركعه الرابعه ،
- ايه ده !!!! موكى !!! انت جيت امتى (تمثيليه دايما بنعملها )
- من بدرى 
- تحب تصلى معايا ؟
- اه

و بدأنا صلاه و طبعا إلتزام كامل منه " الله أكبر " و يحط ايده على بعض و يعمل انه بيقرأ الفاتحه معايا ، ثانيه واحده هى زمن الالتزام ، بعدها رجع يلف الحجره كلها و يشوف كل حاجه و و و و 

خلصنا ركعتين ، عايز ياخدنى و نخرج نعلب بقى ، قلت له استنى لسه فاضل 5 ركعات ، هتكمل معايا ولا تخرج ،
- لأ هثلى ، بث انا هقعد على الكرسى 
الجزمة مصر انه يصلى على الكرسى زيى و مش مشكله انا ، اتصرف مع نفسى,
بدأنا صلاه و بدأ يقف على الكرسى علشان يقرأ الفاتحه ، و انا بعدين لما جينا نركع ، لمحته بيحاول يقعد على حرف الكرسى علشان يوطى زيى و اتزحلق و ووقع ، 
لما جيت اسجد ، طلع يقعد تانى علشان يسجد من على الكرسى و بيحاول بجسمه اللى هو كله اصلا صغير لدرجه انه على حرف الكرسى لو جه يوطى ثقله يبقى فى الهوا و يقع ، فكان بيجاهد طول الوقت انه ( يسجد و يحفظ توازنه ، و ما يقعش و يركز معايا احنا فى انه وضع سجود ، ركوع ولا ايه )
كان شكله سكر و هو بيحاول يصلى جلوسا و ليس وقوفا ، حته بتاعه صغيره لو كعبرته كله فى ايديك هايكون قد الكف ، بس هلاَس و يعرف ازاى يبلف اللى قدامه و يتمحلس له بكل كرامه و كبرياء .

المهم ، خلصنا ركعتين ، و رجعنا لأوضاعنا سالمه ، انا على الكرسى  و هو واقف على الارض ، 
بدأنا تانى الصلاه ، و انا امسك بالمصحف علشان اقرأ منه ، لمحته بيحط كفوفه جنب بعض علشان يعمل فيها بيقرأ زى ما انا بقرأ و يهز راسه شمال و يمين كأنه بيقرأ ، 

طبعا زى كل مره الإلتزام لا يستغرق منه سوى ثوانى معدوده ليعود يلف الحجره و يعمل البدع ، المهم انه لما يلاقى انى فى التشهد بتاع الصلاه يجرى يقعد جنبى و يستنى انى أسلم و اختم الصلاه علشان هو كمان يخلص صلاته.

واد مؤمن .

.

.
.
.
.
.
.
.
.
.
.
.
.
.

موكى ، انت حبيبى انا ، بحبك قد الدنيا دى كلها.

طبعا ما حدش يعلق و يقول لى ايه الصلاه اللى كلها ( بتلمحيه فيها بالتفاصيل دى و مركزه فى ايه ولا فى ايه ) لأن اى أم عارفه قصدى ايه و محدش يقدر يحوش نفسه عن مراقبة الاطفال حتى و هو بيصلى إلا لو فيه حد كبير تانى فى المكان واخد باله منه ،



بوست مش عادى

البوست ده مش بالضبط علشان الحاجات السكره اللى المجرم الصغير موكى بيعملها , بس علشان قد ايه الحاجات دى بتلون حياتى سواء منه ولا من اخواته و هما صغيريين و وهما كبار ماشاء الله عليهم، هما الفرحه اللى فى حياتى ، كل الوان الدنيا  والسعاده بتيجى مع دخلتهم علينا البيت ،
اولاد اخواتى هما الريشه اللى بترسم البسمه و الهدوء و راحة البال - للحق مش دايما يعنى ، ساعات الواحد بيكون عايز يعلقهم على الحيطه واحد واحد و يطوح فيهم الضرب ، حتى الزئرد الصغير اللى (إحم ، لامؤاخذه فى اللفظ ) جاعورته بتخلى الواحد عايز يرميه من الشباك - الجمله الاعتراضيه اللى فاتت لا تدل سوى على رهافه مشاعرى ، المهم ان فعلا كل واحد فيهم له بصمه و معنى زى الزهور لما الواحد يزرعها حب و تبدأ تطلع بورق اخضر جميل رقيق و يكبر و يزهر لأجمل الزهور و الألوان ، 
زى قوس قزح يطلع يطل على سمايا و يخلينى احب الدنيا ،

أولاد اخواتى جميعا ، انتم حياتى و سعادتى ، ..... إحم ، يا كلاب :)

السبت، يوليو 13، 2013

حوار

الحوار التالى كان بين طفلين لا يتجاوز عمرهم 7 سنين راكبين عجل فى الشارع :

- يالا تعالى ،
- لأ اصل انا خايف ، اصلى اول مره اجى الشارع ده
- خايف !!!!! يا بنى ده الشارع بتاعى ، انا كنت ساكن هنا 
- اه اه انا عارف مكان شقتك القديمه.
- طيب ، يالا بينا ، يالا ...

الخميس، يوليو 04، 2013

ممكن تقتل البنات ؟

xbox شغال و اللعب على ودنه ، موكى و مارو و بودى بيلعبوا ادوار 
موكى خلص ، و الدور على بودى ، و بدأ بودى اللعب .
موكى طبعا زى ضله و قاعد على راسه اصلا ،
و فجأه ،
موكى : ممكن يا بودى تقتل البنات ؟
بودى : اقتل البنات !!! ليه ؟
موكى : علشان انت وحش (فتحه على الواو ، سكون على الحاء و الشين ) .