ع.ي.ا. ل @@@ عيال

سئلت لماذاوما هدفها؟أجيب بأنه من الانانيه أن نكتب عن أنفسنا فقط فى حين أن الأطفال( معجزة حية من معجزات الرحمن) يُعَّلِمونناو يقَوِّمون الكثير من سلوكياتنا بتـلـقـائـيـه ليس لها مثيل برغم تكبّرنا على الأعتراف بهذا ............ محركى الأحداث: **بودى: كى جى 1 ...5 سنوات **أميرة: ثالثة ابتدائى .شهادة يا ناس...8 سنوات **نوران: ثانية ابتدائى....7 سنوات حاليا اخيرا و ليس أخرا , محمد أحمد سنتين و مفيش كلام. عام 2017: بودى 17،أميرة21،نوران20،موكى8 سنوات

الجمعة، فبراير 18، 2005

الحسين

هبقى اخدك و نروح الحسين
مين الحسين دة يا جدوا
اسئلى مامتك
ماما مين الحسين دة
الحسن و الحسين , مش اخدتيهم فى المدرسة؟
لأ
الحسن و الحسين أحفاد الرسول علية الصلاة و السلام
يااااه و هما لسة عايشييين؟
عايشين اية انتى عبيطة؟؟
امال بتقولى هنروح عندهم ازاى؟
.المسجد , المسجد بتاعهم, هنروح المسجد بتاع الحسين
امضاء
أميرة

الجمعة، فبراير 11، 2005

كلام شاعرى

امبارح كلمنى فى التليفون و قالى كلام شاعرى جميييل
اه قالك " ازيك يا حبيبى وحشتينى " و كده يعنى
اه و قال لى كمان " عاملة اية ؟ , انا زعلان عشان انتى
ما جيتيش تبوسينى من على الباب زيك كل مرة."
علامات السعادة و الفرحة تبدوا على وجهها كمن ملكت كنز سليمان
ايوه يا مدّ لعة ماهو مفيش غيرك حبيبة بابا , ياعنى هيقول الكلام دة لمين تانى يعنى

السبت، فبراير 05، 2005

عيال فافى عيال صحارى عيال تعيش ت تعيش ت تعيش

مشهد خارجى : فجر يوم جديد
شنط بتتحط و عيال بتتصف
كله جاهز ؟؟
يالا بينا
رحلة طويلة تتخللها استراحات قصيرة ( لا أذكر الكثير عن أحداثها لأنى كنت نايمة طبعا)ء
مشهد خارجى: ظهر و شمس و حر و برد

اللى أفتكره أن لما المنظم للرحلة حب يعمل تتدريب عملى لتسلق الجبال الرملية للأطفال الفافى لقيتهم اتحولوا لقرود نطط فطط و لما وصلت القمه هتفت بالنصر و رجعوا أطفال تانى
و لما المنظم حب ينزلهم لقيت مشهد من ملحمة 6 أكتوبر و أطفال بضحى بنفسها و بتجرى عشان تنط

و عندها.. و عندها .. و

فى اللحظه المناسبة طار سوبرمان الرحلة اللى كان متنكر فى صورة المنظم عشان يلحقهم قبل ما ينزلوا شهداء التدريب
مرت ساعات و ساعات ...

وصلنا محميه سانت كاترين و هناك العيال كانوا مبهورين ( عيون خارجة من مكانها و سنان خلفية أول مرة تشوف النور لما الأفواه أتفتحت من كتر الدهشة)ء
خلصنا الجولة السياحية اللى كانت تمهيد لأيام صحراوية , صحراوية, صحراويةء

تم تنظيمنا فى سيارتين مجهزتين أتم التجهيز (إترصينا جنب بعض و فوق بعض زى علب البولوبيف فى مخزن قديم)ء
مشهد خارجى : عصر و جبال و شنط كتييير
و فى جو مرح تم خلطنا على بعض من خلال أجهزه خلط حديثة تعتمد على الصخور الطبيعية و الكثبان و الجبال
خرجنا من السيارات أخر الرحلة كل واحد بيدور على أسمه اللى راح للى جنبة أو وقع فى الأرض
رصينا الشنط و كل واحد عرف مكان مبيته و رحنا إتعرفنا على المكان و على الشيخ جميل ( و هو روح جميلة فعلا) و على باقى أفراد قبيلة الجبالية اللى هيكونوا معانا طول أيام الرحلة
عم أبراهيم ( مورد النور للغرف من لمبات جاز الى شموع مثبتة فى الرمل داخل زجاجات بلاستيك)ء
عم محمد ( طاهى الفراشيح و اللبة)ء
صباح ( السائق المحترف صاحب الفضل الأول فى ضياع أسمائنا داخل السيارة)ء

... و غيرهم من اهل الكرم
دخلنا أتغدينا على ضوء الشموع و بعد الكلام سمعنا حكاية الشيخ جميل عن صنع اللبة ( هحكيها بعدين )ء
و خرجنا من مكان الغداء لقينا الظلام حل و النجوم احتلت أماكنها فى السما و
...
ياااااااااااااااااه إية الزحمة دى النجوم دى كلها جات إمتى
احنا أكيد بقينا نص الليل
بصيت فى الساعة لقيتها 7:30 مساءً
...دخلنا رتبنا اماكن نومنا و لكن
جاءت اللحظة الحاسمة اللى بان فيها معدن العيال الفافى على أصلة
و لقيت نوران شجيعة الشجعان بترفض واقع النوم مع باقى اصدقاءها لوحدهم
جه بابا و قال
" لية يا نونو مش إحنا اتفقنا على كده و قلنا الرحلة عشان نتعلم فيها حاجات جديدة؟؟
لأ لأ أنا قولتلك مش عايزة أروحها إنت اللى كنت عايز مش أنا
و فى خضم معركة الإقناع تسحبت إنجى لمامتها تشكو الغدر و الوحدة " هما سيبينى أنام بعيد , أنا عايزة أنام معاكى يا ماما"ء
و بعد هرج و مرج فى حجرة البنات الصغار سناً الكبار تحملاً كما أثبتت الأيام فيما بعد تم وضع اتفاقية الكرم الأولى لسنة 2005
و التى تقتضى بأن أنام مع الصغار هذة الليله فقط على أن يتم ترحيلى فى اليوم التالى بعد أن أقنعنا المتمردين بالتراجع عن مخططاتهم العيالية
و راحت أيام و عدت سنين
تجوال مع سلمى و ياسمين لرعى الغنم و المعيز.hikingو رحنا
و تحول الأطفال الفافى لقرود مرة أخرى و كانوا مش سايبيين صخرة ولا تلة إلا لما يطلعوها و ينزلوها و يطاردوا الغنم حوليها لما تسببوا فى انقاص وزن الغنم للنص

ياااه تعبت
اه يا رجلى الحقينى يا طنط اتزحلقت
يعنى أركبك حمار بس ع الطريقة المففينة ponyطب ممكن أركبك
يامامى معزة معزة انا خايفة
ياه شوفوا الصخرة دى زى الصخور بتاعة الصفا و المروة
طب ممكن اخد مروة علشان اوريها لمامى
دة بقى نبات العجرم كانوا زمان بيستخدموه زى الصابون
عجرم !!زى نانسى عجرم هاهاهاها..هاها
لأ نوسة عجرم هاهاهاهاهاهاهاهاااهاهاها
ياه الدنيا حر قوى
انا عطشانه
متشربى ميه هوا احنا خلاص هنفضل هنا للأبد!!!ء
و جة وقت الغدا ....
لما رحنا نجمع الحطب و أصبحت كل البنات تستهدف النباتات الجافه و تنقض عليها بأرجلها كما تفعل ياسمين ثم يقتلعونها
لنجمع الحطب
و بعدين قامت ياسمين ببدء مراسم عمل اللبة التى تتلخص فى وضع العجين على كيس بلاستيك
ثم ردمه بالرماد فوقه جمر
و بعد ان ينضج يتم قلبة على الجهة الاخرى و تتكرر نفس العملية ثم يتم تنفيضة من الرماد و تأكل ( لم أذق اطعم من هذا النوع من الخبز هو و الفراشيح )
ء
يااااااااااي احنا هناكل البياع دة , دى بتعملوا ع التراب و الرمله !! لأ اانا مش هكله
مامى احنا لازم ناكل من البتاع ده
يععععععععععع ايه ده
.
.
.
حاولت أشرح لهم إن الشمس الحارقه دى بتطهر كل الحاجات اللى حولينا و ان مفيش خوف و العيش ده احسن من الكرواسان بتاع الخباز اللى عندنا

بقى ده احسن من بياع الخباز إزاى بقى
فى القاهرة كل حاجة بتتلوث بسرعه من العادم او غيرة انما هنا فين و فين لما تعدى عربية , لو حصل تلوث اديكوا شايفين احنا ازاى الشمس بتعقمنا و تحمصنا يعنى لو كان فيه تلوث زمانه مات من زمان
و لما اللبه استوت لقينا هجوم التتار عليها الكل عايز يدوق و اللى داق عايز تانى

...و جينا نروح
أى رجلى اتجزعت
طيب امشى عليها بالراحة
بس هيسبقونى
معلش يسبقوكى دلوقتى احسن ما ما تروحيش معاهم بكرة
يالا و انا همشى معاكى بالراحة انا و ياسمين
تعالوا تعالوا امى معاها زليطه تعالوا شوفوها
و رحت انا و فرح المجزوعة نشوف الزليطه و لقيت معزة وليدة بتحاول تقف على رجليها و تمشى لأول مرة
و حتى الحبل السرى لسه فيها و لسة اثار الولادة من دم و بلل على جسمها و لما مسكتها
... و لسه بقول لفرح شايفه الجمال ال
ياماما لأ بخاف بخاف
طيب بصى من بعيد شوفى عاملة ازاى
و ياسمين قالت لنا
هما لية مشيوا من فوق الجبل؟ ما الطريق ده احسن
قلنالها وارينا قالت هنا هنمشى من تحت الجبل و كده احسن عشان رجلها
قالتها بطريقة " اية العبط اللى غاويين تعب قلب و تنطيط فوق الجبال ما يلفوا من حوليين الجبل و خلاص"ء
و فعلا مشينا من تحت سفح الجبل بس على ما وصلنا كان الباقى قلقان علينا و اعتبرونا من المفقودين ء
جه الليل و اتعشينا و راحت البنات الكبار يلعبوا و فجأة حصلت المجزرة و الثورة
بين البنات الكبار و البنات الصغار فجمعوا الأطراف كلها و خلال الجمع كان
if you want you can take me as a refrence ,عموا
you know i will tell u all what u want
......هما قالولى
.....لأ لأ أنا مقلتش كده انا قلت
.....لأ اللى حصل كان
و اخيرا تم جمع افراد الثورة و حركة التمرد قام الكبااار قالوا احنا نخلى الشيخ جميل يعمل قعدة عرب و يحكم بينكوا
البنات الكبار و الصغار كله انهار و خاف و الدموع بقت انهار
حسوا ان الموضوع كبر قوى منهم و هيوسع بزيادة فالكل ظالم و مظلوم طالب بالصلح
و الصلح خير زى ما احنا عارفين
و مجرد ما خرجوا بدأت الحرب الباردة بين الأطراف المتصالحة
و راحوا ناموا لما حسوا ان الفجر هيطلع عليهم كانت الساعة ساعتها 8:30 مساءً تقريبا
و عدت ايام و سنيين
فى الواحة و طلعوا نص جبل و العيال الفافىhiking و راحوا
بقت عيال صحارى متمرسين فى الفراشيح و اللبة و العدس ابو جبة
واللى مش بياكل كان بياكل و اللى مش متعود إتعود و الفضل الكبير للشيخ جميل اللى كان بيحايل و يدلع
فالاطفال كلهم حبوه و احترموه
كانوا يتلموا حوليين النار فى الليل و البرد يسمعوا حكاوية الجميلة عن الشاطر حسن , النمر و الجمل , و حاجات كتير جميلة
و بعد ما خلصنا و جة معاد مرواحنا كان الكل بيقول مفيش ففينة كله جدعنه
و هما كلهم كانوا عيال أخر جدعنة فعلا مش هزار
و الكل مصدقش ان اليومين بتوع الجبل و الصحراء كانوا فعلا يومين بالعدد لانهم حسوا انهم يعرفوا المكان و الناس هناك من زمان و زمان