البيييييييه

الأم : شايفه يا تيته بودى مش مركز فى المذاكره ازاى

تيته: طبعا ما هو البيه عامل فيها ابو العريف

صوت ما : لأ البيه علامه و عارف كل حاجه

عمو أيمن : لأ البيه حمار

هنا بودى قرر يتدخل و يصحح للناس الكلام اللى بيتقال عنه و قال " لأ البيه شبشب " بابا بيقولى كده

ثقة

اليكم الأحداث دون تعليق منى

أميره : يا نوثة بصى إمبارح فى الكلاس المستر كان عمال يقول للعيال ازاى ان اى درجات زياده هياخدوها الاسبوع ده هتتحط لهم فى الدفتر بتاع الدرجات بتاعهم . و فجأه و هو بيشرح سكت و بصلى و قالى " اه طبعا ما انتى مش محتاجه "ء

أنا : سألتها " ليه يا ميرو يقول كده؟ "

أميره : أصلى جايبة الدرجات النهائيه و كنت قاعده بسرح فى حواجبى

إزيك يا صاحبى

"صباح الخير , إزيك ؟ "

" عامل ايه النهارده ؟

إحنا بقى لما تكبر هنكون صحاب , و هنلعب مع بعض ماشى ؟

دى بقى اصبحت من اهم جمل الصباح الرسميه التى يلقيها عبد الرحمن على أخوه النونو اللى لسه ماتولدش

يقوم كل يوم الصبح يصبح على مامته و بعدين يوجه الكلام للجنين عشان يتعرف عليه و يحبه