ع.ي.ا. ل @@@ عيال

سئلت لماذاوما هدفها؟أجيب بأنه من الانانيه أن نكتب عن أنفسنا فقط فى حين أن الأطفال( معجزة حية من معجزات الرحمن) يُعَّلِمونناو يقَوِّمون الكثير من سلوكياتنا بتـلـقـائـيـه ليس لها مثيل برغم تكبّرنا على الأعتراف بهذا ............ محركى الأحداث: **بودى..............كى جى 1 ..5 سنوات **أميرة.......ثالثة ابتدائى .شهادة يا ناس...8 سنوات **نوران.......ثانية ابتدائى....7 سنوات حاليا اخيرا و ليس أخرا , محمد أحمد سنتين و مفيش كلام

الثلاثاء، فبراير 05، 2008

عبد الرحمن

ده مش تحيز لعبد الرحمن بس حب و احترام لهذا الرجل مش هاقول ولد لألألأ راجل تقوللى ليه؟
أقولك انا ليه:
أنا حصلى الشرف و خرجت مع استاذ عبد الرحمن فى يوم السبت اللى فات
أخذته معى كصاحب و صديق سيبكوا من انه ما كانش طايقنى عشان هو خارج لهدف معين , و أنا خرجته من الموضوع و أخذته فى زياره رسميه لمريض و حرجت عليه ينطط او اسمعلوا حس. " اصلى عمه حنينه اوى " و لو سمعتلوا حس مش هيحصلوا خير
الولد كتم فى نفسه و كبر دماغه و اخذنى على قد عقلى
المهم خلصنا الزياره اللى حرمته فيها من متعة الفضول و متعة الامساك بالمحاليل او التنطيط فى طرقات المستشفى و اخذته اشترى له منتوفلى اه منتوفلى من حق كل مواطن يلبس منتوفلى فى الشتا حتى و هو فى بيت تيته و جدو
المهم انا بأعلن لبودى كامل اسفى على انى خليته يجرب حاجه مش عايزها و اتزرزرت عليه فى المحل لأنه برضه طلع راجل و استحملنى و هاودنى على قد عقلى
نيجى بقى لاهم حاجه فى الاستاذ عبد الرحمن " حنيته" و قلبه الطيب و جمال اخلاقه
الولد و احنا مروحين كان عايز يأكل كيس مش عارفه ايه كده اهى حاجه زي الشيبسى و الشيتوس . المهم انى اشتريت له اللى هو عايزه و بس . مفكرتش فى حاجه تانيه و يالا يا بودى عشان نروح . لقيت الولد سكت و مشى معايا و هو شبه مكبوس
بقولوا لو جعان و عايز تفتح الكيس و تاكل يا بودى افتحه
لقيت الولد بيقوللى " لأ انا .. أنا هبقى افتحه فى البيت و ناكله انا و اميره و نورا "
بس خلاص انا عارفه بودى حنين جدا بس ممكن متلاحظش الحنيه دى بس لما قالى كده كبر جدا فى نظرى لأنى عارفه ان الاندال " اميره و نورا " عمرهم ما قالوا " هنعمل كذا مع بودى " لأ دوول بيبيعوا وش من غير لحظه تردد يمكن عشان هما بنات مع بعض فمش بياخدوا بالهم من الكائن المذكر اللى معاهم و هو عشان هو كائن وحيد وسطهم فهو بيحس بيهم اكتر
المهم اننى بكتب الكلام ده عشان يكون شاهد على اعتذارى الرسمى المعلن امام الجميع لأى اساءه للاستاذ عبد الرحمن او أى تقليل من شأنه بأعتباره طفل صغير " هو فى عينى راجل كبير و بيتحمل مسئوليه " و يكون شاهد على حبى له و اعتزازى بيه لأبد الأبدين و يا رب يكون فى احسن حال و يكون قد المسئوليه دائما