ع.ي.ا. ل @@@ عيال

سئلت لماذاوما هدفها؟أجيب بأنه من الانانيه أن نكتب عن أنفسنا فقط فى حين أن الأطفال( معجزة حية من معجزات الرحمن) يُعَّلِمونناو يقَوِّمون الكثير من سلوكياتنا بتـلـقـائـيـه ليس لها مثيل برغم تكبّرنا على الأعتراف بهذا ............ محركى الأحداث: **بودى..............كى جى 1 ..5 سنوات **أميرة.......ثالثة ابتدائى .شهادة يا ناس...8 سنوات **نوران.......ثانية ابتدائى....7 سنوات حاليا اخيرا و ليس أخرا , محمد أحمد سنتين و مفيش كلام

الاثنين، فبراير 23، 2009

أميره

هى شخصية منظمه, تحب الدقه فى المواعيد
تحمل هم ماذا سيحدث لو بودى ما ركبش اتوبيس المدرسه عشان "البييييه" كان بيلعب مع صاحبه و نسى
تحمل هم ان يفلت لسان بودى و يقول للمشرفه الخاصة بالأتوبيس انهم النهارده "باب" عشان المشرفه هتفضل تقول هاتوا من الورق ما يثبت ذلك.
"باب" يعنى مش هيركبوا الأتوبيس بتاع المدرسه عشان حد ها يفوت ياخدهم لمشوار أو ما شابه.
آه و على فكره جمع باب هو " بابات" عند أميره.
تحب البكاء كثيرا , و اعتقد ان هذا هو سبب روقان دماغها, فهى تفرغ جميع الشحنات السلبيه فى البكاء , آه و نسيت كمان و فى الزرزره على بودى و يمكن الدور يجى على كابتن جوده " اسم مؤقت منى لحد ما يرسوا له على اسم" فى الزرزره.
تحب القراءه , كونت قاموس لغوى جيد , لكنها مع الأسف لم تحب المغامرين الخمسه و الألغاز عموما , رغم اننى تخيلت ان العامل الوراثى سيلعب دور فى هذا , فنحن بالإخوُّه , أنا و جميع إخوتى نقرأ الألغاز ,, غريب جدا العامل الوراثى ده.

هى طبعا , ما شاء الله , اللهم احفظها و احميها من كل سوء متفوقه دراسيا , و هذا نابع من داخلها و ليس بالإجبار.

هى أميره التى تشعرنى احيانا انها أعقل منى و اننى يجب ان أكبر و اعقل اكثر من ذلك

هى أميره التى تفخر بأنها " البنت الوحيده " و تقولها بكل فخر و ألاطه و ترفع إصبع السبابه فى يدها اليمنى و تلتفت كما المسمار القلاوظ حول نفسها و هى تقول هذا.

هى أميره التى كانت تعتقد ان أولاد البوابين عندها فى الشارع هما أكثر ناس بيئه , لحد ما راحت رحله القناطر الخيرية و رأت أناس يمشون حفاه و أطفال عراه , عندها قالت " يااااااااااااى , أنا اللى كنت فاكره ان ولاد البوابين اللى عندنا بيئه"

هى أميره اللى قررت تتبع النظام الأرستقراطى , يمكن الناس تتعظ و تتعلم. فقامت فى ملاهى "فوقه" اللى فى القناطر الخيريه و الناس كلها هجوم على عربيات التصادم , بأن تطلب بكل أرستقراطيه من احدى المهاجمات على العربه ان تفسح لها كى تلعب هى عشان شايفه ان الدور عليها فقالت لها " لو سمحتِ ممكن تقومى عشان أركب أنا ".

هى أميره اللى مالهاش زى

الأحد، فبراير 22، 2009

أخيرا و بعد طوووول انتظار


يا رب يكون من اهل اليمين
وصل الكابتن جوده رابع المجموعة العزيزه و أخو أميره و عبد الرحمن , مجموعة العيال اللى هما سبب سعادتى و كفايه عندى ضحكه منهم عشان اعرف النعمة اللى ربنا انعمها عليا بوجودهم فى حياتى , هما روحى و سعادتى و ذكرياتى


اللهم اهديهم جميعا لصراطك المستقيم و اعفوا عنهم و اجعلهم من عبادك الصالحين.



نيجى بقى للمهم من تعليقات مبدأيه لبودى و أميره:


بودى : يععع ايه الشعر ده غطييه غطييه


أميره : هو طالع شبهى الحمد لله


اميره و بودى : ايه صوته المعيزى ده هاهاهاها


اميره : ها يطلع ابيض يا بخته


بودى و أميره : هو ضوافره عامله كده ليه , طويله و متضخمه و شوفتى شوفتى عامله ازاى يععععععع!!!!


لسه باقى التعليقات المهمه ها نسمعها لما يشوفوا البيبى على الطبيعه , كل اللى فات كان من الصور بس.

السبت، فبراير 21، 2009

السر الخطير

يا نوسه , على فكره و يبدأ بالهمس كاشفا عن السر الخطير
ماما هتجيب البيبى بكره
بكره ايه بس يا بودى, مش هى هتجيبه يوم الأحد ؟؟
مش بكره السبت , هى قالت بكره اخر يوم
طيب جهزت له سريره ؟؟
يرتبك و يشعر بالذنب, و يقول : لأ ماما هى اللى جهزتله كل حاجه. اصل انا عندى مذاكره و امتحانات الاسبوع الجاى