هى اتفرج ع كاتون..... هى نام

قاعده فى حالى ولا على بالى ,

لقيت موكى , جاى عليا , بيجاهد و هو بدحرج ال بطيخه على الارض قدامه 

-ايه يا موكى ده , انت جايبها هنا ليه ؟؟

-ارفع نوسه , ارفع فوق.

عايزنى ارفع له البطيخه على السرير !!!!

-ليييييه , تعالى نرجعها مكانها ,

-ارفع نوسه , ارفع.

و سابنى و بدأ يحاول يشيلها لوحده , قمت ساعدته علشان اعرف اخرتها ايه .

-ادينا رفعناها , فيه حد يحد البطيخه على السرير يا موكى ؟؟

-هى اتفرج ع كاتون ( هى اتفرج على الكارتون ) .

و سابنى و طلع على السرير جنبها يكمل فرجه على الكارتون بتاعه و هو حاطت ايده عليها زى اللى حاطت ايده على كتف واحد صاحبه.

و بعد شويه لقيته راح فى جنب السرير و عايز ينام و بيغطيها و يقولى , هى تعبانه , هى نام.

عيل ندل

الاستاذ موكى , راضى عن تيته و بيلعب معاها و سايبها تدلعه يمين و شمال , كعادته , يحب ان يلعب بأحرف الكلمات و يكون كلمات جديده , لا يهم ان تكون ذات معنى , و كعادتنا ننساق بهبل للعبته و نقلده فيما يقول. فجأه لقيت البيه ماشى ينادى على مامته 

ماما

ماما

ماما

ايوه يا موكى 

تيته قالت لى كلمه وحثه

قالت لك ايه تيته ؟

قالت لى بب

الكلمه مش على هوا الاستاذ.

حوثان

يقترب موكى من اللعبه المجسمه ليمتطيها قائلا : حوثان

نوسه : لأ يا موكى مش حصان , دى زرافه, عايز تركبها

و ترفعه نوسه هو و الزرافه و تمشى به حتى الصاله و تنزله 

موكى : حوثان , دى حوثان

نوسه : لأ يا موكى قلنا اسمها زراااااااااافه , اسمها ايه ؟ زرافه.

موكى : لأ حوثان , ...... حوثان قول هاو

نوسه : حصان و بيقول هاو !!!!

موكى :  حوثان قول نيو .

انا شويه , انت شويه

نوسه تبحث عن نظارتها فى كل مكان كالعاده

نوسه : النظاره بتاعتى فين يا موكى , راحت فين ؟؟ دور لى عليها

موكى : بكره نثترى واحده من المحل

نوسه : لأ يا موكى انا عايزه النظاره بتاعتى , عااااااااااااااا , و تبدأ فى تمثيل البكاء

موكى : مث لاقيها , بكره نثترى واحده , 

و يقوم بتمثيل البحث عن النظاره , فيتجه لحجرتها ثم لمنتصف الصاله و يدور دوره كامله حول نفسه و هو متحير و يردد : مش لاقيها معلث

ثم فجأه يلمح اخته  أميره , فيقف للحظات و يتجه اليها بثبات و يقول لها: انت ثويه و انا ثويه 

و يقوم بأخذ نظارتها من على وجهها و يضعها على وجه نوسه و يقول مؤكدا : انا ثويه , انت ثويه