إحنا فى رمضان ،
سيبتهم و دخلت اصلى التراويح ، و انا بعيد عنكم من ذوى خشونة الركبه ، يعنى بصلى و انا قاعده على الكرسى ,
يقوم موكى بيه يدخل - مش دخول قوى ، هو إقتحام مبلطج للحجره - و يفضل يلف حوالين نفسه و يطوح فى ايده لحد ما سلمت من الركعه الرابعه ،
- ايه ده !!!! موكى !!! انت جيت امتى (تمثيليه دايما بنعملها )
- من بدرى
- تحب تصلى معايا ؟
- اه
و بدأنا صلاه و طبعا إلتزام كامل منه " الله أكبر " و يحط ايده على بعض و يعمل انه بيقرأ الفاتحه معايا ، ثانيه واحده هى زمن الالتزام ، بعدها رجع يلف الحجره كلها و يشوف كل حاجه و و و و
خلصنا ركعتين ، عايز ياخدنى و نخرج نعلب بقى ، قلت له استنى لسه فاضل 5 ركعات ، هتكمل معايا ولا تخرج ،
- لأ هثلى ، بث انا هقعد على الكرسى
الجزمة مصر انه يصلى على الكرسى زيى و مش مشكله انا ، اتصرف مع نفسى,
بدأنا صلاه و بدأ يقف على الكرسى علشان يقرأ الفاتحه ، و انا بعدين لما جينا نركع ، لمحته بيحاول يقعد على حرف الكرسى علشان يوطى زيى و اتزحلق و ووقع ،
لما جيت اسجد ، طلع يقعد تانى علشان يسجد من على الكرسى و بيحاول بجسمه اللى هو كله اصلا صغير لدرجه انه على حرف الكرسى لو جه يوطى ثقله يبقى فى الهوا و يقع ، فكان بيجاهد طول الوقت انه ( يسجد و يحفظ توازنه ، و ما يقعش و يركز معايا احنا فى انه وضع سجود ، ركوع ولا ايه )
كان شكله سكر و هو بيحاول يصلى جلوسا و ليس وقوفا ، حته بتاعه صغيره لو كعبرته كله فى ايديك هايكون قد الكف ، بس هلاَس و يعرف ازاى يبلف اللى قدامه و يتمحلس له بكل كرامه و كبرياء .
المهم ، خلصنا ركعتين ، و رجعنا لأوضاعنا سالمه ، انا على الكرسى و هو واقف على الارض ،
بدأنا تانى الصلاه ، و انا امسك بالمصحف علشان اقرأ منه ، لمحته بيحط كفوفه جنب بعض علشان يعمل فيها بيقرأ زى ما انا بقرأ و يهز راسه شمال و يمين كأنه بيقرأ ،
طبعا زى كل مره الإلتزام لا يستغرق منه سوى ثوانى معدوده ليعود يلف الحجره و يعمل البدع ، المهم انه لما يلاقى انى فى التشهد بتاع الصلاه يجرى يقعد جنبى و يستنى انى أسلم و اختم الصلاه علشان هو كمان يخلص صلاته.
واد مؤمن .
.
.
.
.
.
.
.
.
.
.
.
.
.
.
موكى ، انت حبيبى انا ، بحبك قد الدنيا دى كلها.
طبعا ما حدش يعلق و يقول لى ايه الصلاه اللى كلها ( بتلمحيه فيها بالتفاصيل دى و مركزه فى ايه ولا فى ايه ) لأن اى أم عارفه قصدى ايه و محدش يقدر يحوش نفسه عن مراقبة الاطفال حتى و هو بيصلى إلا لو فيه حد كبير تانى فى المكان واخد باله منه ،
