ع.ي.ا. ل @@@ عيال

سئلت لماذاوما هدفها؟أجيب بأنه من الانانيه أن نكتب عن أنفسنا فقط فى حين أن الأطفال( معجزة حية من معجزات الرحمن) يُعَّلِمونناو يقَوِّمون الكثير من سلوكياتنا بتـلـقـائـيـه ليس لها مثيل برغم تكبّرنا على الأعتراف بهذا ............ محركى الأحداث: **بودى..............كى جى 1 ..5 سنوات **أميرة.......ثالثة ابتدائى .شهادة يا ناس...8 سنوات **نوران.......ثانية ابتدائى....7 سنوات حاليا اخيرا و ليس أخرا , محمد أحمد سنتين و مفيش كلام

الأحد، أكتوبر 27، 2013

انا كبرت

نوسه كانت بتكوى هدوم ،و موكى بيتفرج عليها ، فجأه موكى مد ايده علشان يمسك المكواه و يكوى هو
نوسه : لأ يا موكى ، شيل ايدك ما ينفعش علشان انت لسه صغير ممكن تتلسع و ايدك تتحرق من المكواه
سكت موكى شويه و بعدين شد جسمه كده و قال : ثوفى ، انا اهه كبرت ، انا كبيير
قلت له : لأ لسه صغير ، لما تكبر كمان شويه 
موكى : اكبر قد ايه يعنى ؟
نوثه : تكبر ... تكبر قد عبد الرحمن ، او قدى ، شوف انا طويله ازاى ؟لما تبقى طولى.
سكت موكى تانى و بعدين راح وقف على الكرسى و قال لى : اهه ، انا كبرت ثوفى ازاى .

الشطرنج ، أن أن أن أننننننن

موكى : تيجى نلعب شطرنج
يالا ، تعالى
تعالى نلعب شطرنج
يالا ، انا عايزك تلعبى معايا شطرنج
نوثه : حاضر يا موكى ، يالا بينا
موكى : انا الابيض و انت الاسود ، ماثى ؟
نوثه : موافقه
و بدأنا نرتب الشطرنج و قرر موكى بدأ ذى بدأ انه هيرتب الابيض بتاعه كده 
يهديك يرضيك ، تفهم فيه ما تفهم ، هو كده
بدأنا نلعب و اريته ازاى العسكرى ياكل اى قطعه قدامه ، 
ساحه الشطرنج اصبحت ملعب لعسكرى واحد ف إيده يوديه كل حته و ياكل بيه كل القطع و يقول لى ايه " انا ههرب ، و استخبى "
نوثه : يا موكى ما ينفعش ، مفيش هروب فى الشطرنج ، هجوم بس و دفاع
موكى : لأ انا ههرب و استخبى و راء الملك علثان مث تقدرى تموتينى
!!!!!
استسلمت انا للأمر الواقع ، 
جه تانى يوم و لازم جدو يلعب معاه شطرنج 
موكى : تعالى يا جدى العب معايا ثطرنج
و يقعد جدوا يلعب و انا فى المطبخ ، و فجأه
موكى : نوثه ، نوثه ، مث أنا ازقه كده بالعسكرى هو يخسر و يموت ؟
نوثه : اه يا موكى
موكى : ثفت ، ثفت يا جدى ، انت خثرت. انا اللى كسبت ، نوثه قالت كده.