شحن التابلت خلص

اليوم الجمعه و موكى جاب لنا صديقه ساهر معاه

بعد الغداء كله قاعد يلعب ، موكى بالتابلت و بودى بالتابلت و ساهر على كمبيوتر تيته

...

بعد فتره شحن التابلت يخلص ، و موكى يقرر يغور على كمبيوتر ساهر و لازم يلعب بيه

- موكى :     هات يا ساهر دورى

ساهر :         انت بتلعب بالتابلت

موكى :         ما شحنه خلص ، انا عايز دورى 

ساهر :         لا اشحن التابلت و العب بيه و هو بيشحن

موكى :         هو انت جاى بيت تيته علشان تقول لى ما  تلعبش بالكمبيوتر بتاعها !!!!!!!!!

العيل السخنه

22 فبراير ، انه يوم نستعد له كما نستعد لكل فرد فى العائله تقريبا

و بما ان ده يوم عيد ميلاد قردنا الصغير موكى 

قرر عمه ايمن ان يقضى هذا اليوم فى ال " عيل السخنه " او " العيال السخنه " حسب سماع موكى ، و ان يحتفل له هناك 

و نروح و نحط الشنط و يجرى موكى و بودى على حمام السباحه على ما نخلص.

و نتحرك جميعا بكل كسل داخل الشاليه و بعد قليل يعود موكى و بودى متكتكيييييييييييييين من البرد

حمام السباحه مش مجهز للنزول شتاءا

و بعدها بفتره قلنا نروح البحر اكيد هيكون دافى خاصه وقت العصر

و نجرب ننزل و المياه تجمد شعر راسنا من  البروده

و بعد شويه نقرر نغامر انا و بودى و ننزل نزله رجل شجاع

و موكى نزل معانا

و رجع قعد و اتكلفت فى الفوطه.

و كل شويه ينزل البحر و هو اصلا بيترعش

ف عمه قاله خلاص مفيش نزول كده يجيلك برد

فيميل موكى على مامته و يقول لها " هو كان جايبنى العيل السخنه علشان يقول لى ما تنزلش تعوم !!!!!!!!!!!! "